ගීතා රුක්මණී වර්ණසූරිය වන මා 1952 නොවැම්බර් මස 07 වන දින රාගමදී උපත ලැබූ බෞද්ධ කාන්තාවක් වෙමි.අප කුඩා කල සිට පදිංචිව සිටියේ නුගේගොඩ රේමන් පාරේ නිවසේය.මාගේ මුල් පාසල වූයේ නුගේගොඩ අනුලා විද්‍යාලයයි. W.M.S.වර්ණසූරිය මහතා වන මාගේ පියාගේ ගම ගාලූ දිස්ත‍්‍රික්කයේ දොඩන්දූව කුමාර කන්ද ග‍්‍රාමයයි.මාගේ මව වන ධර්මවතී ද සිල්වා මහත්මිය අම්බලන්ගොඩ දිස්ත‍්‍රික්කයේ අලූත්වල ග‍්‍රාමයේය.ඇය ගුණගරුක ගෘහණියකි.

මාගේ පියා ජර්මන් රටෙන් ටිප් ටොප් (Tip Top) යන නාමයෙන් වාහන ටයර් අලූත්වැඩියා කිරීම සහ අමතර කොටස් ආනයනය කල එකම ශ්‍රී ලාංකික නියෝජිතයා ලෙස කටයුතු කළේය.කොළඹ මරදාන සදන් මෝටර්ස් (southern motores) නමින් ව්‍යාපාරයක් පවත්වා ගියහ.කල්යත්ම මාගේ පියාට අවශ්‍ය වුණා ගමේ පදිංචියට ගොස් ඔහුගේ උපන් ගමට සේවය කිරීමට.ඒ අනුව අප කොළඹ අතහැර ගාලූ දිස්ත‍්‍රික්කයේ දොඩන්දූව කුමාරකන්ද ග‍්‍රාමයට පදිංචියට ගියේය.වාහන නඩත්තු කිරීම සඳහා AUTO HOUSE නමින් ආයතනයක්ද ආරම්භ කරන ලදී.

මා හට සහෝදරයන් තිදෙනෙකු සහ සහෝදරියක් සිටියා.මා සහ මාගේ නැගණිය ගාල්ල සවුත්ලන්ඞ් බාලිකාවට ඇතුලත් වූ අතර මාගේ සහෝදරයන් තිදෙනා ගාල්ල රිච්මන්ඞ් විද්‍යාලයට ඇතුලත් විය.පසුව බාලම සොහොයුරා ඉගෙනීමට දක්‍ෂ බැවින් පියාට අවශ්‍ය වූයේ ඔහු වෛද්‍යවරයෙකු කිරීමට ය. එම නිසා කොළඹ රාජකීය විද්‍යාලයට ඇතුලත් කර විය.

මාගේ පියා ව්‍යාපාර කටයුතු කරගෙන යන අතර ගමට විශාල සේවයක් සිදු කලහ.පියා දොඩන්දූව ග‍්‍රාමයේ සමථ මණ්ඩලයේ සභාපතිධූරය ද හෙබවිය.ඒ අතර පියාගේ පෞද්ගලික ලේඛම් තනතුරට මා පත්කර ගන්නා ලදී.මාගේ රාජකාරිය වූයේ උසාවියේ නඩු විභාග කරන අවස්ථාවේ පැමිණිලි සහ විත්ති පාර්ශවයන්ගේ කරුණු කාරනා සටහන් කිරීමත් එම කරුණු මත නැවත සිතාසි නිකුත් කිරීමට පිළියල කර අදාල පොලිස් බල ප‍්‍රදේශ සඳහා යොමු කිරීමටය.

මා මුල්වරට සාරියක් ඇන්දේ මෙම රැකියාව සඳහායි.එම හැට්ටය මා විසින්ම මසා ගන්නා ලදී.මට මාසික වැටුප වශයෙන් රජයෙන් රුපියල් 50 ක චෙක්පතක් ලැබුණි.එය මාගේ මුල්ම වැටුප විය.

මාගේ පියා එම ජනතාවට නීතිගරුක අවංකව සාධාරණව යුතුකම් ඉටු කරමින් එම තනතුර හෙබවිය.අද මාගේ මැහුම් පන්ති වලට සහභාගීවන සිසුන්හට නීති ගරුකව අවංකව පාඨමාලා උගන්වන ගුරු කාන්තාවක් වූයේ මාගේ පියාගෙන් ලද අත්දැකීම් මතය.

එවකට මාගේ තිබූ එකම බලාපොරොත්තුව ගුරු වෘත්තියේ නියලීම යි.නමුත් පියාගේ දේශපාලන කටයුතු මත නාම ලේඛනයෙන් මාගේ නම ඉවත් වූ බැවින් ගුරු පත්වීම අහිමිවිය.

කුඩාකල සිට මා ඉතාමත් ආසාවක් දැක්වූයේ කෑම සෑදීම සහ ඇදුම් මැසීමට ය.මා කුඩාකල අමතර පන්ති වශයෙන් සහභාගි වූයේ කුකරි පන්ති සහ මැහුම් පන්ති සඳහා පමණි.එම කාලයේ තිබුණේ පතරොම් සහිත (BLOCK ක‍්‍රමය) ඇදුම් මැසීමේ ක‍්‍රමය පමණි.පසුව මා 1975 වර්ෂයේ සිට පතරොම් සහිත ක‍්‍රමයට මැහුම් පන්ති පැවැත්විය.ඊට අමතරව කේක් පන්තිද පැවැත්විය.

එම වකවානුවේදී එනම් 1978 වර්ෂයේ බද්දේගම පදිංචි පූගොඩ පෙහෙකම්හලේ විධායක නිලධාරියෙකු ලෙස සේවය කල ජයසිරි ද සිල්වා මහතා සමඟ විවාහ වී පූගොඩ පෙහෙකම්හලේ නිල නිවාසයට පදිංචිය සඳහා පැමිණියහ.

එතැන් සිට මා ඔබ අතරට පැමිණියේ ගීතා ද සිල්වා යන නාමයෙනි. ලතා වර්ණසූරිය වන මාගේ නැගණිය 1987 වර්ෂයේ විවාහ වී නවසීලන්තයේ පදිංචියට ගියහ.අද ඔස්ටේ‍්‍රලියාවේ මෙල්බන් නගරයේ දරුවන් සමග ස්ථීර පදිංචිව සිටියි.මාගේ වැඩිමහල් සොහොයුරා වන ගාමිණී වර්ණසුරිය මහතා ව්‍යාපාරිකයෙකි.දෙවන සොයුරා වන සුනිල් වර්ණසූරිය මහතා ව්‍යාපාරිකයෙකු වූ අතර අද ජීවතුන් අතර නොමැත.මගේ බාල සොහොයුරා පියාට අව්‍යය වුයේ වෛද්‍යවරයෙකු කිරීමට නමුත් ඔහු ඉතා කැමැත්තක් දැක්වූ කලා ක්‍ෂේත‍්‍රයට යොමු විය.ඒ අද ඔබ හදුනන චිත‍්‍රපට අධ්‍යක්‍ෂකවරයකු ලෙස කටයුතු කරන උදයකාන්ත වර්ණසූරිය මහතායි.

එවකට මාගේ දියණියන් දෙදෙනා වන සෂිකා සහ දිලිනි ගම්පහ සිරිකුරුස විදුහලට ගිය බැවින් ගම්පහ රතුපස්වල ඉඩමක් මිලදී ගෙන නිවසක් තනන ලදී.

පූගොඩ පෙහෙකම්හල 2000 වසරේදී රජයේ විවිධ දේශපාලන මත භේද අනුව වසා දමන ලදී.එය රටට ඉතා කණගාටුදායක කරුණකි.එබැවින් මා නිල නිවාස අතහැර ගම්පහ රතුපස්වල නිවසට පදිංචිය සඳහා පැමිණියේ ය.දැන් මාගේ ගම වශයෙන් සලකනු ලබන්නේ ගම්පහ රතුපස්වල යි. එම වකවානුවේදී මා මාගේ නිවසට යාබද රන්ලිය ප‍්‍රධාන ආයතනය ගොඩනගන ලදී.

එම කාලය වන විටද මා මැහුම් ක්‍ෂේත‍්‍රයේ පන්ති පැවැත්වීමට යොමුවී සිටි අතර මෙම පතරොම් සහිත ක‍්‍රමයට ඇදුම් මැසීමේදී සිසුන්ට තේරුම් ගැනීම අපහසු වීම සහ ඉතා අධික කාලයක් ගත වන බැවින් 1995 වර්ෂයේ සිට මාගේ නිර්මානශීලී හැකියාව මත මෙම පතරොම් රහිත ඇදුම් මැසීමේ ක‍්‍රමය නිර්මාණය කිරීමට හැකි විය.එය මාගේ ජීවිතය නව මාවතකට හැර වූ බව කිව යුතු වේ.තවද මෙය පෙර භවයේ සිට මා හට පැමිණි දෙයක් ලෙස මා හට දැනේ.

කල් යාමේදී මෙම පතරොම් රහිත මාගේ ක‍්‍රමයට මා නමක් දැමීමට සිතුවා ඒ අනුව මාගේ ස්වාමියා සමග සාකච්ජා කර රන්ලිය පතරොම් රහිත ඇදුම් මැසීමේ ක‍්‍රමය යන නාමය මා සමාජයට ඉදිරිපත් කලා.

පතරොම් රහිත ඇදුම් මැසීමේ ක‍්‍රමය යටතේ සිසුන්ට වටිනා සහතිකයක් ලබා දීම සඳහා 2002 වසරේ රන්ලිය ඉන්ස්ටිටියුට් පුද්ගලික සමාගම (RANLIYA INSTITUTE PVT LTD) වශයෙන් මා මාගේ ආයතනය ලියාපදිංචි කලා.

මෙම මාගේ ක‍්‍රමයට නිර්මාණ හිමිකම් බලපත‍්‍රය (Patent Licen) ගැනීමට අදාල ආයතන වලට ගියද එම ආයතන වලින් පැවසුවේ පාඨමාලාවක් සඳහා පේටන්ට් බලපත‍්‍ර ලබා දිය නොහැකි බවයි.මෙය ඔබගේ බව සනාථ කිරීම සඳහා මැහුම් ග‍්‍රන්ථයක් නිකුත් කරන ලෙයසි.

ඒ අනුව පතරොම් රහිත ඇදුම් මැසීමේ ග‍්‍රන්ථය රන්ලිය පබ්ලිකේෂන් පුද්ගලික සමාගම (Ranliya publiction pvt ltd) යටතේ 2006 වර්ෂයේ එලි දක්වන ලදී.ඉදිරියේ මා මෙහෙයවනු ලබන එක් එක් පාඨමාලා යටතේ ග‍්‍රන්ථ නිකුත් කිරීමට බලාපොරොත්තු වෙමි

වෘත්තීය පුහුණු ආයතනයේ NVQ LEVEL - 4 සහතිකය ලබා දුන්නේ පතරොම් රහිත ඇදුම් මැසීමේ ක‍්‍රමයට පමණි. නමුත් NVQ LEVEL - 4 සහතිකය මාගේ ක‍්‍රමයට එනම් පතරොම් රහිත ක‍්‍රමයට ලබා ගැනීම සඳහා වෘත්තීය පුහුණු ආයතනයේ අනුමැතිය ලබා ගැනීමට ඉල්ලූම් කල අතර මාගේ අයදුම්පත තුන් වරක් ප‍්‍රතික්ෂේප විය.මෙම ප‍්‍රතික්ෂේප වීමට හේතුව දැනගැනීමට මා වෘත්තීය පුහුණු ආයතනයට ගිය විට එම උසස් නිලධාරිතුමා පැවසුවේ ඔබට NVQ LEVEL - 4 සහතිකය පතරොම් රහිත ඇඳුම් මැසීමේ ක‍්‍රමයට දිය නොහැකි බවත් ඔබ ආයතනයේ පතරොම් සහිත ක‍්‍රමයට (BLOCK) ක‍්‍රමයට පාඨමාලාවක් නිර්මාණයක් ඉදිරිපත් කර නැවත අයදුම්පතක් සකසා එවන ලෙසය.

මා අවසාන වරට එතුමාට පැවසුවේ එක් කරුනකි ඔබතුමාගේ පතරොම් සහිත ක‍්‍රමයට ෂර්ට් එකක් මැසීමට සිසුවෙක් ඉදිරිපත් කර මැසීමටත් මාගේ පතරොම් රහිත ක‍්‍රමයට ෂර්ට් එක මැසීමට සිසුවෙකු ඉදිරිපත් කර මැසීමටත් අවසර දෙන ලෙසට ය.ඒ අනුව ඔබතුමා එම ෂර්ට් එක නිවැරදිව ප‍්‍රමිතියට අඩුකාල වේලාවකින් මැසීමට මාගේ සිසුවා දක්ෂ වුවහොත් ඔබතුමා මාගේ ක‍්‍රමයට එනම් පතරොම් රහිත ක‍්‍රමයට NVQ LEVEL - 4 අනුමත කර දීමට සලකා බලන ලෙසටය.එතුමාට මා කල අභියෝගය මත මාස එකහමාරක් පමණ ගිය පසු මා හට NVQ LEVEL - 4 සහතිකය සඳහා අනුමැතිය ලබා දුනිමි. මාගේ නොපසුබට අධික උත්සහය මත පතරොම් රහිත ඇදුම් මැසීමේ ක‍්‍රමයට අවසානයේ අනුමැතිය ලැබුණි.එතුමාට මා ඉතා අවංකවම ස්තූතිවන්ත වෙනවා.

නමුත් එක් කරුනක් පිළිබඳව මාගේ හිතේ තවමත් දෝංකාර දෙයි. එනම් එම ආයතනය පැවසුවේ පතරොම් රහිත ඇදුම් මැසීමේ ක‍්‍රමය යන නාමය වෘත්තීය පුහුණු ආයතනයට භාවිතා කල නොහැකි බවත් NVQ පරීක්‍ෂණ විභාගයේදී පතරොම් රහිත හෝ සහිත කුමන හෝ ආකාරයට ඇදුම් කපා මසා හොඳ නිමාවක් තිබේනම් NVQ LEVEL - 4 TAILOR වශයෙන් සහතික ලබා දීමට අනුමැතිය ලබා දෙන බවටය.අද රජයේ වෘත්තීය පුහුණු ආයතනයේද මාගේ මෙම ක‍්‍රමය ක‍්‍රියාත්මක වෙනවා.නමුත් අද වෘත්තීය පුහුණු ආයතනයේ නව උසස් නිලධාරිතුමන්ලා මේ කරුණ ගැන නොදන්නවා ඇති මා ගත් වෙහෙස ගැන.

2011 වර්ෂයේ ශ්‍රී ලංකාවේ ප‍්‍රථමවරට පෞද්ගලික ආයතනයක් වන මාගේ රන්ලිය ආයතනයට NVQ LEVEL - 4 සහතිකය ලබා ගැනීමට හැකි වුණා.එය මාගේ සිසුවියන් සහ අනාගත සිසුවියන් වෙනුවෙන් ලැබූ ජයග‍්‍රහණයකි.

මේ අතර මා විසින්ම පිරිමි දරුවන් වෙන්වෙන් බේකරි පාඨමාලාවද මෙහෙයවනු ලබයි. NVQ LEVEL - 4 BAKER සහතිකය සඳහා වෘත්තීය පුහුණ ආයතනයේ 2012 වර්ෂයේ අනුමැතිය ලබා ගතිමි.

මාගේ රන්ලිය ප‍්‍රධාන ආයතනයට NVQ LEVEL - 4 TAILOR සහ NVQ LEVEL- 4 BAKER සඳහා විභාග මධ්‍යස්ථානයක් වශයෙන්ද අනුමැතිය ලබා දී ඇත. එය මා ලැබූ තවත් ජයග‍්‍රහණයකි.

මාගේ වැඩිමහල් දියණිය මාගේ අඩිපාරේ යමින් කේක් පාඨමාලා අංශයට යොමු වී පන්ති පැවැත්විය. නමුත් අද ඇය කුඩා කල සිට මාගේ පියාගෙන් ඇයගේ සීයාගෙන් ඇයට ලැබුණු ඔවදන් මත එම අඩි පාරේ යමින් ජර්මන් රටෙන් Tip Top යන නාමයෙන් ටයර් අළුත්වැඩියා කිරීම සහ වාහන සම්බන්ධව විදේශ රටවලද සම්බන්ධතාවය ඇතිව ගම්පහ GLITZ PARK PVT LTD නමින් නවීන වාහන අලූත්වැඩියා කිරීමේ අංගනයක් මහා පරිමානයෙන් ඇයගේ ස්වාමියාගේද සහයෝගය ඇතුව පවත්වාගෙන යයි.

මාගේ බාල දියණිය පාසල නිමවී බැංකු ක්‍ෂේත‍්‍රයේ රැකියාවකට ගිය අතර මාගේ ඉල්ලීම මත එම රැකියාවෙන් ඉවත් වී මාගේ මැහුම් ක්‍ෂේත‍්‍රයේ නියලී සිටී.දැන් ඇය FAIRY DRESS MAKERS PVT LTD නමින් පෞද්ගලික ආයතනයක් පවත්වාගෙන යයි.ඇයද මා මෙන් ශ්‍රී ලාංකික කාන්තාවන් වෙනුවෙන් විශාල සේවයක් ඉටු කරයි.

අද මාගේ එකම බලාපොරොත්තුව වනුයේ සියලූම කාන්තාවන් සඳහා මෙම මැහුම් ක්‍ෂේත‍්‍රයේ අංගසම්පූර්ණ දැනුමක් ලබා දී මෙම පතරොම් රහිත මැහුම් ක‍්‍රමයෙන් ඔවුන්ගේ ආර්ථිකය ගොඩ නැගීමයි.

මැහුම් පාඨමාලාවට අමතරව කෙටිකාලීන සාරිහැට්ට පාඨමාලාවලතිරරෙදි පාඨමාලාව සහ අධිවේගී මැෂින් පුහුණු පාඨමාලාව ද ඉදිරිපත් කර ඇත.

අද දහස් ගනන් ඩිප්ලෝමාලාභී ගුරුවරුන් බිහි කර ඇත.ඔවුන්ගෙන් සමහර ගුරුවරු රජයේ වෘත්තීය පුහුණු ආයතනයේ ස්ථීර ගුරු පත්වීම් ලබා සිටී.දහස් ගනන් ස්වයං රැකියාලාභීන් බිහි කර ඇත.මහපරිමාන ව්‍යාපාරිකයින් බිහි කර ඇත.මේ අනුව කාන්තාවන්ගේ දෑත් සවිමත් කර ලියන් රන්ලියන් කර ඇත.

කෙටිකාලීන සාරි හැට්ට පාඨමාලාව පමණක් හදෑරු සිසුන් ඉතා ඉහල ආදායම් මාර්ගයක් උපයා ගනී.තිරරෙදි පාඨමාලාව හැදෑරු සිසුන් දේශීය විදේශීය වශයෙන් මහා පරිමානයෙන් ව්‍යාපාර පවත්වා ආදායම් මාර්ග උපයා ගනී.බේකරි පාඨමාලාව හදාරා NVQ LEVEL - 4 ලබාගත් සිසුන් තරු පන්තියේ හෝටල් ක්‍ෂේත‍්‍රයේ දේශීය විදේශීය රැකියා සඳහා යොමුවී ඇත.ස්වයං රැකියා ව්‍යාපාරද පවත්වා හොද ආදායම් මාර්ග උපයා ගනී.

මා සැමවිටම පිටවී යන දරුවන්ට දෙන එකම ඔවදන ඔබ යම්කිසි දිනක ගුරුවෘත්තියේ යෙදෙනවානම් කිසිම ගුරු මුෂ්ටියක් නොමැතිව මුදල් පසුපස හබා නොගොස් ඉගැන්වීම් කලයුතු බවත් එයින් සාධාරණව මුදල් ඉපයීම කල යුතු බවත් ය.එවිට මුදල් නිරායාසයෙන්ම අප පසුපස හබා එනු නොඅනුමානය.

මවක් සහ ගුරුවරියක් වශයෙන් හැමවිටම මා බලන්නේ විශේෂයෙන් සිසුන්ගේ විනයයි.මා නිතරම මාගේ සිසුන්ට පවසන අනෙක් කරුන නම් දෙමව්පියන්ට සැලකිය යුතුයි. ගුරුවරුන්ට ගරු කල යුතුයි.තම ආගම ධර්මයට අනුව ගුණගරුක විය යුතුය. තමා විවාහකනම් තම ස්වාමියාට ගරු කල යුතුය ස්වාමියාද බිරිඳට සහයෝගය දිය යුතුය සැම විටම යම්කිසි මුදලක් ඉතිරි කල යුතුය යන ඔවදන්ය.

අවසානයේ මාගේ සිතට ලොකු සතුටක් දැනෙනවා ශ්‍රී ලාංකික බෞද්ධ කාන්තාවක් වශයෙන්, කාන්තාවන් වෙනුවෙන් මාගේ ශ්‍රී ලාංකීක රටට අවංක සේවයක් ඉටු කිරීමට හැකිවීම පිළිබඳව.

Geetha De Silva Melborune TV Interview

මෙම පතරොම් රහිත ඇදුම් මැසීමේ ක‍්‍රමය තුලින් මා ලබාගත් තනතුරු සහ ජයග‍්‍රහණ

01. 1997- ශ්‍රී ලංකාවේ ප‍්‍රථම වරට පතරොම් රහිත ඇදුම් මැසීමේ ක‍්‍රමය පිළිබඳව රූපවාහිනියේ නුගසෙවන වැඩසටහන මගින් කාන්තාවන් සඳහා නොමිලේ පාඩම් මෙහෙයවීම.

02. 1999- ශ්‍රී ලංකාවේ ප‍්‍රථම වරට පතරොම් රහිත ඇදුම් මැසීමේ ක‍්‍රමය පිළිබඳව තරුණි සහ නවලිය පුවත්පත් වලට පාඩම් මෙහෙයවීම සහ ශ්‍රී ලංකාවේ සෑම දිස්ත‍්‍රික්කයක්ම ආවරණය වන පරිදි මැහුම් පන්ති පවත්වන බව ප‍්‍රචාරය කිරීම සඳහා දැන්වීම පල කිරීම.

03. 2000- ශ්‍රී ලංකාවේ ප‍්‍රථම වරට පතරොම් රහිත ඇදුම් මැසීමේ ක‍්‍රමය යටතේ රන්ලිය ඩිප්ලෝමා ප‍්‍රදානය උත්සවය පැවැත්වීම සහ සිසුන්ගේ ඇදුම් නිර්මාණ තරඟය පැවැත්වීම.

04. 2003- කලා ප‍්‍රසාදිනී දිරියමාතා ගෞරව සම්මානයෙන් පිඳුම් ලැබීම

05. 2006- ප‍්‍රථම වරට පතරොම් රහිත ඇඳුම් මැසීමේ ග‍්‍රන්ථය නිකුත් කිරීම

06. 2007- මුළු දිවයිනටම සාම විනිසුරු පදවියෙන් පිඳුම් ලැබීම.

07. 2010- TVEC ආයතනයේ ඇගයීම් නිලධාරිනියක ලෙස පත්වීම ලැබීම. TAILOR ASSESSOR ( NVQ LEVEL - 4) TAILOR RE NO CBA/0866/2010

08. 2012- TAILOR LEVEL -4 සහතිකලාභියෙකු වීම.

09. 2013- BAKER LEVEL - 4 සහතිකලාභියෙකු වීම.

10. 2016- ශ‍්‍රී ලාංකීය කාන්තාවන් වෙනුවෙන් කල මෙහෙවරය වෙනුවෙන් ආචාර්ය උපාධියෙන් පිදුම් ලැබීම.

11. 2018- ප‍්‍රථමවරට පතරොම් රහිත ඇඳුම් මැසීමේ ක‍්‍රමය පිළිබඳව ශ‍්‍රී ලාංකීය කාන්තාවක් වශයෙන් විදේශීය රටක (sri lanka morning show t.v melborn) මුල් වරට මැහුම් ක්ෂේස්ත‍්‍රයේ රූපවාහිනී වැඩසටහනකට සහභාගී වීම.

මීට අමතරව දෙහිවල සිංහ සමාජයේ සාමාජිකත්වය දැරූ අතර අඩු ආදායම්ලාභී කාන්තාවන්හට නොමිලේ පාඨමාලා මෙහෙයවීම.වැඩිහිටි කාන්තා පිරිමි දෙපාර්ශයවයටම ඇස් කණ්නාඩි ලබාදීම යන මෙහෙවර කාන්තාවන් සඳහා ඉටු කරන ලදී.

මාගේ පැතුම

නුගේගොඩ පාඨමාලාව නිමවී යන දිනයේ එක් සිසුවියක් මෙම ලිපිය මා අතට පත් කරන ලදී.මේ ආකාරයටම අතින් ලියා තිබුණි.මෙය මට ඉතා සංවේගී බවක් දැනුනු බව කිව යුතුය.අදටත් මෙය මාගේ සිතේ නිරතුරුවම දෝංකාර දෙයි.



මව්පිය සෙනෙහස සොයා ඇවිද ගියෙමි
උපන්දා සිට දිවි ගමන තුල....
.. පියාණනි .. යැයි හඬන විට ඔහු මා හැර
ගොසින් බොහෝ කලය....
.. අම්මා .. යැයි හඬන විට ඇසුනේ මට ගුවන් යානය
ඉගිලෙන හඬ පමණය....
කාලය ඉගිල අද මා මවක් වී ඇත
අද මා සොයනුයේ දිවිය ජය ගන්නටය....
එබැවින් මා දිනක ගොඩවිය ඔබේ තක්සලාවට
ශිල්ප ඉගෙනීමට පමනක්ය....
ඇවිද ගිය කතරේ මා පැමිණ තිබුනේ , ක්‍ෂේම භමියකට,
බව මට සිහිවුණි....
දුටුවෙමි මා ඔබව කතරට වැටුණු, වැහි බිදුවක්,
ලෙසින් මෑණියනි ගුරු ....
ගුරු මුෂ්ටිය නැතුවම කියා දුන්නා නිම කරන්නට
මනරම් වස්ත‍්‍රයක්....
දඩුවම් කලාය වැරදි නිවැරදි කරන්නට
දුන්නාය ඔවදන් දිනන්නට ජීවිතය....
පෙන්වා දුන්නාය යන්නට නිවැරදි මග
සිහිවුණා මට බණ කථාවල මහා ප‍්‍රජාපතිය ඔබද කියා
බුදු බව පැතූ සිදුහත්ට කිරි මවක් වූ
සිතුනා මට බයිබලයේ සිටි මරියා ඔබද
පවින් ලොව ගලවන්නට දිවි දුන් ජේසුට
ආත්මීය මවක් වූ
මියෙන තුරුම සිහි කරමි ගුරුමව්නි පියාණෙනි,
ඔබ දෙපල....
මා පින් පුරන්නේ යශෝධරාවන් විශාඛාවන්
වන්නම නොව....
නිවන් දක්වා ජාති දක්වා සසර සැරි සරන තුරා
වන්නට හැකිද එක් වරක් හෝ මට
ඔබේ දියණියක වී උපදින්නට....

බෞද්ධ කාන්තාවක් වන මා නිවන් දක්නා තුරා කාන්තාවන් වෙනුවෙන් කැපකර මෙවන් දියණියන්ට ආර්ථිකය ගොඩනංවා ගැනීමට ගුරු මවක් වීමයි. හැකි ඉක්මනින් මෙම සියලූ දේ අතහැර මාහට නිවන් අවබෝධ වේවායි මාගේ පැතුමය.

රන්ලිය අධ්‍යාපන ආයතනය

ආරම්භය - 1998 ජනවාරි 01

රන්ලිය අධ්‍යාපන ආයතනය ශ‍්‍රී ලංකාවේ මුල් වරට පතරොම් රහිත මැහුම් කලාව හදුන්වා දුන් ගීතා ද සිල්වා මහත්මිය විසින් 1998 ජනවාරි 01 දින ආරම්භ කරන ලදී.එය තනි පුද්ගලික ව්‍යාපාරක් ලෙස 1998 ජනවාරි 19 දින ලියාපදිංචි කරන ලදී. රන්ලිය සහතිකය දේශීය සහ විදේශීය පිළිගත් සහතිකයක් ලෙස පත් කිරීම සදහා රන්ලිය ආයතනය සංස්ථාවක් ලෙස ලියාපදිංචි කෙරුණි.ඒ 2002 අපේ‍්‍රල් 11 වන දිනය .රන්ලිය අධ්‍යාපන ආයතනය 2009 මාර්තු 18 වන දින ශ‍්‍රී ලංකා වෘත්තීය පුහුණු ආයතනයේ ලියාපදිංචි කරන ලදී. NVQ Tailor Level - 04 සහතික නිකුත් කිරීම සදහා 2011 ජනවාරි 19 වන දින ලියාපදිංචි කරන ලදී.රන්ලිය ආයතනය NVQ Tailor Level - 04 සහතිකය නිකුත් කිරීමට අවසර ලත් ශ‍්‍රී ලංකාවේ ප‍්‍රථම පෞද්ගලික සමගම වේ.මිට අමතරව NVQ Tailor Level - 04 සහතික නිකුත් කිරීම සදහා 2012 මැයි 23 වන දින ලියාපදිංචි කරන ලදී.

රන්ලිය ආයතනයේ පාඨමාලා මෙහෙය වන ආකාරය

රන්ලිය ආයතනයේ සියලූම පාඨමාලා ආචාර්ය ගීතා ද සිල්වා මහත්මිය විසින් මෙහෙයවනු ලැබේ.එතුමිය අවුරුදු 45ට අධික කාලයක් මැහුම් ක්ෂේස්ත‍්‍රයේ නියැලී සිටි අතර එයින් වසර 25ක සිට අද දක්වා පතරොම් රහිත ඇදුම් මැසිමේ කලාවේ නියැලී සිටී.රන්ලිය අධ්‍යාපන ආයතනය වෘත්තීය පුහුණු ආයතනයේ NVQ Level 4 මැහුම් සහ බේකරි පරීක්ෂණ විභාග පැවැත්වීමට අනුමැතිය ලබා ඇත. එයට අමතර අධිවේගී මැෂින් පුහුණු පාඨමාලාවක්, තිරරෙදි පාඨමාලාවක් සහ පේෂල් මේකප් රුව අලංකාර කිරීමේ පාඨමාලා මෙහෙයවනු ඇත.

රන්ලිය අධ්‍යාපන ආයතනයේ මුල් කාර්ය මණ්ඩලය මතක සටහන්

රන්ලිය අධ්‍යාපන ආයතනය සේවක අර්ථසාධක අරමුදල් ගෙවීමට 2006/03/26 වන දින ලියාපදිංචි කරන ලදී.

අධ්‍යාපනය අතින් කොතරම් උගත් ඉහල දැනුමක් තිබුනද උසස් රැකියාවක් කලද කාන්තාවන් සතුව තිබිය යුතු ගුණාංග

* තම ආගම පිළිපැදීම සහ ගෞරව කිරීම
* තම දෙමව්පියන්ට සැලකීම සහ ගරු කිරීම
* තම පිරිසිදුකම
* තමා අවට පිරිසිදුකමලනිවසේ පිරිසිදුකම සහ පිළිවෙල
* ප‍්‍රියමනාපකම සහ කාරුණික බව
* අවංකකම,උත්සාහය
* උදෑසන අවදි වීම
* අරපිරිමැස්ම
* තම දෑතින් ඇදුමක් මසා ගැනීමේ හැකියාව
* තැනට සුදුසු ඇදුමක් ඇදගෙන යාමේ හැකියාව

මෙවන් කාන්තාවක් සිටින නිවස දියුණුවේ ඉහල මංපෙත්කරා යනු ඇත. මෙවන් කාන්තාවක් ලබා ඇති ස්වාමියාද ඉතා වාසනාවන්තය.

රන්ලිය ආයතනයෙන් කුමන හෝ පාඨමාලාවක් හැදෑරු කාන්තා පිරිමි දෙපක්ෂයට වයස් භේදයකින් තොර

රන්ලියෙන් ලැබෙන රන් ඔවදන්

දියුණුවේ මග

* උදේ පාන්දරම අවදි වන්න
* එදින කලයුතු වැඩ එදින කරන්න.හෙටට කල් දමන්න එපා
* උත්සාහය,කැපවීම,අවංකකම ඇති කරගන්න
* නැහැ බැහැ කියන වචන අයින් කරගන්න
* බුද්ධියෙන් අඩු අය (බාලයන්) ආශ‍්‍රය අඩු කරන්න
* දෙමවුපියන් දෙන අවවාද පිළිගන්න,පිළිපදින්න උත්සහ ගන්න
* ගුරුවරයාට,අම්මාට සහ තාත්තාට ගරු කරන්න
* තමා වැඩිහිටි අවදියට පත්වුවාට පසු හෝ විවාහයෙන් පසු,දෙමවුපියන්ගේ කුමන වැරදි තිබුනත් බනින්න,සැර කරන්න ,ඔරවන්න එපා.එයින් තමාට විශාල පවක් ඇතිවන්නා සේම,දියුණුවේ මගට බාදා පැමිණේ.වැරදි තිබේ නම් පෙන්වා දෙන්න උත්සහ කරන්න.ඉවසන්න පුරුදු වෙන්න - ඉවසීමෙන් සැනසීම ලැබේ
* මුලින්ම හවුල් ව්‍යාපාර නොකරන්න
* පඩිපෙලක් නගින ආකාරයට අඩියෙන් අඩිය දියුණු වෙන්න
* දියුණු වෙන්න වෙන්න නිහතමානී වෙන්න.මුල අමතක නොකරන්න,උඩගු නොවන්න,අන් අයට උදව් කරන්න * සියුම් සිනහව ආභරණයක් කරගන්න
* කෙනෙකුට අසාධාරණයක් නොකර,මුලා නොකර මුදල් උපයන්න
* සුළු මුදලක් හෝ ඉතිරි කරන්න පුරුදු වෙන්න

තරුණ අම්මා තාත්තාට දෙන අවවාදයකි.

* චුටි දුව සහ පුතා උදේ පාන්දරම අවදි කරන්න.නැගිට්ට විගස තමා නිදා ගත්ත ඇද හදලා නැගිටින්න පුරුදු කරවන්න.
* දරුවන්ට නම කියා කතා කරන්න එපා.දුව පුතා කියා කතා කරන්න.
* අම්මා තාත්තාට ඔයාලමෙයා යන වචනයෙන් කතා කරන්න පුරුදු කරවන්න එපා.
* එසේම ගුරුවරුන්ට සහ වැඩිහිටි අයටදලඔයාලමෙයා කියා කතා කරන්න පුරුදු කරන්න එපා.
* සහෝදර සහෝදරියන්ට නම් කියා කතා කරන්න පුරුදු කරන්න එපා.අක්කා සහ අයියා කියා කථා කරන්න.
* විශේෂයෙන් චුටි දුවට සහ පුතාට පළමු වසරේ සිට පහ වසර දක්වා හොද ගතිගුණ පුරුදු කරන්න.සෑම විටම යහළුවන්ගේ දෙමවුපියන් ගැන සහ ඔවුන්ගේ පරිසරය ගැන සොයා බලන්න.
* දවසට එක් වරක් හෝ පවුලේ සැම එකතු වී කෑම කන්න පුරුදු වෙන්න.

පුතා හෝ දුව විවාහ වී ඔබ නැන්දම්මා හෝ මාමණ්ඩි යන උත්තරීතර නාමයෙන් පිදුම් ලැබුවා නම්

* ලේලියට,බෑනාට පුතාට හෝ දුවට ආදරය කරන්නා සේ ආදරය කරන්න.දුරකතනයක් ඇත්නම් සතියකට හෝ මාසයකට වරක්වත් බෑනාට ලේලියට කතා කරන්න.පවුලේ විස්තර කතා කරන්න.
* යම් අඩුපාඩුවක්,උදව්වක්,අවවාදයක් අවශ්‍ය නම් මුලින්ම ලේලියගෙන් හෝ බෑනාගෙන් ඉල්ලන්න හෝ අහන්න.
* ලේලියගේ හෝ බෑනාගේ සුළු සුළු අඩුපාඩුකම් පෙනුනොත් එය පුතාට හෝ දුවට කියන්න එපා.ආදරයෙන් අවවාද කරන්න.
* මෙම ඉහත කරනු කාරනා ටික ලේලි සහ බෑනාද පිළිපදින්න.

විවාහ වීමට බලාපොරොත්තුවෙන දරුවන් සදහා
* සමහර දරුවන් හිතවත්කම් මත විවාහ ගිවිස ගනී.
* සමහර දරුවන් දෙමවුපියන්ගේ යෝජනා මත විවාහ ගිවිස ගනී.

ඉහත කරුණු දෙකෙන් 2 වන කරුණ ගැන මට කිව යුතු දෙයක් නැත.නමුත් පලවෙනි කරුණ මත එම දුවලා පුතාල දුර දිග නොබලා හිතවත්කම් පවත්වාගෙන යයි.එම නිසා එම දුවලා පුතාලට මා මවක් මෙන් ඔවදන් පෙළක් මෙයින් ලබා දෙමි.

* සෑම විටම දෙදෙනාම එකම ආගමක නම් අදහස් එකට ගැලපේ.
* සෑම විටම පිරිමි පුද්ගලයා වයසින් අඩු කාන්තාවක් විවහ කර ගත යුතුය.
* එම වයස අතර පරතරය අවුරුදු 1 සිට අවුරුදු 5 දක්වා නම් ඉතා යෝග්‍ය වේ.
* අද රටේ පවතින බාහිර ආටෝපයට නොරැවටී සම්බන්ධයක් පවත්වාගෙන යනවිට ඒ සම්බන්ධව තම දෙමවුපියන්ට දන්වා එම දෙමවුපියන් මාර්ගයෙන් තොරතුරු සොයා බලා හොද හිතවත්කමක් මුල පුරන්නේ නම් වඩාත් හොදය.
* තමා විවාහ වූ පසු දෙදෙනා පමණක් එකට එක්වී නිවසක් කුලියට ගෙන හෝ අඩු පාඩු ඇතුව හෝ නැතුව එකට එක්වී කටයුතු කරන්නේ නම් විවාහය සාර්ථක වේ.පසුව ඔබ දෙදෙනා තේරුම් ගත් පසු යලි මුලින් සදහන් කල කරුණු අනුව දෙමවුපියන් සමග හොදින් ජිවත් වෙන්න.
* තමන් අනිවාර්යෙන්ම තේරුම් ගත යුතු දෙයක් ඇත

තමන් හිතවත්කම් පවත්වන කාලයේදී ඉතා මනරම් වදන් ඔබට ඇසෙනු ඇත.නමුත් විවාහයෙන් පසු මාස 6ක් පමණ යන විට දෙදෙනාගේ අඩුපාඩුකම් දෙදෙනාට තේරුම් යයි.ඒවා තේරුම් ගෙන තමන්ගේ ජීවිතය කල්පනාකාරීව ඉදිරියට ගෙන යා යුතු වේ.එම නිසයි මා කලින් පැවසුවේ දෙදෙනා වසරක් පමණ තනියෙන් එකට එක් වී අවබෝදයෙන් යුතුව ජිවත් විය යුතුය යනුවෙනි

විවාහ වූ පසු දෙදෙනා අතර සැකය අවිශ්වාසය ඇති නොකර ගත යුතුය.ඔබ එයට යම් අවස්ථාවකට පත්වුවහොත් එය සාමකාමිව සකච්චාකර විසදා ගන්න.මෙය දුර දිග ගියහොත් විවාහය දෙදරා යනු ඇත.තමන්ට දරුවන් සිටියහොත් එම දරුවන් විශාල මානසික පීඩනයකට පවත්වනු ඇත.දරුවන් ගැන ඔබ අනිවාර්යෙන්ම සිතිය යුතුය.

මෙම කරුණුකාරනා වලට ඔබ නොදැනුවත්ව යම්කිසි විවාහයක් සිදුවී ඇත්නම් මා සිතනවා එය අපගේ පෙර කල කුසල් අකුසල් යැයි සිතා එය අමතක කර තම විවාහ ජීවිතය සාර්ථකව ගත කරන ලෙස.

විවාහයෙන් පසු තම ස්වාමියාට අයියා කියාද තම භාර්යාවට නංගී කියාද ආමන්ත‍්‍රණය නොකරන්න.එසේ කිරීමෙන් තම දරුවන් සහ අනාගත ලාබාල දරු පරපුර නොමග යාමක් වනු ඇත.

තම විවාහ ජිවිතයේ දරුවන් ලැබූ පසු ස්වාමියාට තාත්තීද මවට අම්මීද කියා ආමන්ත‍්‍රණය නොකරන්න.එවිට් සමාජය ඔබ දෙස වපර ඇසින් බලනු ඇත.

මෙම ඉහත සදහන් සියලූ කාරනා මා පන්තිය තුලදී මා ලගට පැමිණෙන සිසු දෙමවුපියන් සහ දරුවන්ට වාචිකව අවවාද දෙනු ඇත.සිසු දරුවන්ට ඇදුමක් මැසිමට උගන්වන්න හරි ලේසියි.නමුත් ඒ අතර සිසුන් යහමගට ගැනීම මගේ එකම පරමාර්ථයයි.

මෙම ඉහත කරුණු කරනා මවක් වශයෙන් මාගේ දුවකුට හෝ පුතකුට දෙන අවවාදයක් ලෙස ඉදිරිපත් කරමි.

පවුලක් රටක් දේශයක් ගොඩනැගීමට මේ ඔවදන් පිළිපදින්න උත්සහ කරන්න.

ගීතා ද සිල්වා මහත්මිය විසින් රචිත මැහුම් ග‍්‍රන්ථ

පතරොම් රහිත ඇදුම් මැසීමේ ග‍්‍රන්ථය 1
මිල - රු 4,500

Order Now

පතරොම් රහිත ඇදුම් මැසීමේ ග‍්‍රන්ථය 2

විද්‍යානුකුලව පතරොම් රහිත ඇදුම් මැසීම පිළිබද සිංහල බසින් ලියැවුණු අංග සම්පූර්ණ මැහුම් පොතකි.මාගේ මැහුම් පංති වලට සහභාගී වීමට අපහසු කාන්තාවන්ට සහ ශිෂ්‍යාවන්ට නිවසේ සිට තමාගේ ඇදුමක් කපා මසා ගැනීමට හැකියාව ලබාගැනීමට හැකි ලෙස මෙම පොත නිර්මාණය කර ඇත.මෙහි ඉදිරිපත් කර ඇති රූප සටහන් මගින් නිර්මාණය පහසුවෙන් තේරුම් කර දීමට මා උත්සහ කර ඇති අතර මේ අනුව විද්‍යානුකුලව ඇදුම් කැපීම සහ මැසීමේ පියවර ලෙසින් රන්ලිය පතරොම් රහිත ඇදුම් මැසීම 1 පොත එළි දක්වා ඇත.

වසර 45ක මැහුම් ක්ෂේස්ත‍්‍රයේ මා ලද අත්දැකීම් පාදක කරගෙන 1995 වර්ෂයේ ශ‍්‍රී ලංකාවට මුල් වරට පතරොම් රහිත ඇදුම් මැසිමේ ක‍්‍රමය හදුන්වා දීමට ලැබීම මෙම ක් ෂේත‍්‍රයේ මා ලද විශිෂ්ඨ ජයග‍්‍රහණයක් ලෙස මෙහිලා සදහන් කිරීමට කැමැත්තෙමි.මා මැහුම් ක් ෂේත‍්‍රයට පිවිසි මුල් කාලය තුළ පතරොම් ආශ‍්‍රයෙන් ඇදුම් මැසීම කෙතරම් අපහසු කටයුත්තක්ද යන්නත්,ඒ සදහා කෙතරම් අමතර කාලයක් වැය කිරීමට සිදුවෙනවාද යන්නත් පිලිබදව විමසිලිමත් වූ අතර කුඩා කල සිට මා ලද නිර්මාණශීලි හැකියාවන් උපයෝගී කර ගනිමින් මෙම පතරොම් රහිත ඇදුම් මැසීමේ ක‍්‍රමය මෙරටට හදුන්වා දීමට මා හට හැකිවිය.

මෙම කටයුතු කරගෙන යෑමට මාගේ දියණියන් දෙදෙනාද සම්පත් දායිකාවන් ලෙස කටයුතු කරයි.මෙම කෘතිය එළිදැක්වීමට ප‍්‍රධාන හේතුව වුයේ අප ආයතනයේ මාස 08 ක කාලයක් තුළ අංගසම්පුර්ණ දැනුම ලබා ඩිප්ලෝමා සහතිකය ලබා හෝ නොලබා පිට වී යන සිසුන්ගෙන් සමහර සිසුවියන් මුදල්මය ලාභය අරභයා විවිධ ආයතනයන් මට්ටමෙන් මෙම පාඨමාලාව විකෘර්ති කර,කොටස් කර ,ඉගැන්වීම් කරනු ලැබීමයි.සමහර ගුරුවරියන් තම රුචිකත්වය සහ නොදැනුවත්කම මත අත්‍යවශ්‍ය වූ කොටස් මග හැර මාස හයක් වැනි අඩු කාලසිමවාකින් මෙම පාඨමාලාව උගන්වා නිමකරනු ලබයි.ශ‍්‍රී ලංකාව තුල සිටින සියළු සිසුන් ඇතුළු කාන්තාවන්ට මෙම පාඨමාලාව හැදෑරීමට මා ආයතනයට පැමිණිය නොහැකියි.නමුත් කවර හෝ ගුරුවරයකු ලගට ගොස් ඉගෙන ගැනීමේදී මෙම පොත ලග තබා ගැනීමෙන් ඔබට ඉතා හොද දැනුමක් ලබා ගත හැකිය.මා හට මෙම කෘතිය කාන්තා පරපුරට දිය හැකි දායාදයකි.එසේම ඔබට දිය හැකි හොද ගුරුවරයෙකි.

රන්ලිය පතරොම් රහිත ඇදුම් මැසිම”කෘතිය සම්පාදනය කිරීමේදී මැහුම් ක් ෂේත‍්‍රයේ මා දිරිමත් කරමින් මේ ගමන් මගේ නොසැලෙන අත්වැලක් වූ මාගේ ස්වාමියා වන ජයසිරි ද සිල්වා මහතාට ද දියණියන් දෙදෙනා වන සශිකා සහ දිලිනිට මාගේ ආදර ස්තූතිය පිරිනමමි.

මෙම රන්ලිය පතරොම් රහිත ඇදුම් මැසිම 1 කොටස තුලින් ප‍්‍රථමයෙන් ඉගෙන ගත යුතු අත්‍යවශ්‍ය කොටස් මා ඉදිරිපත් කර ඇත.මෙම ඇදුම් කොටස් කපා මසා ගැනීමෙන් ඔබට පුළුල් දැනුමක් ලැබෙනු නොඅනුමානයි.පංති කාමරය තුලදී නම් මා මෙම පාඨමාලාවේ ඇති සියලූ ඇදුම් රෙද්ද මත ඇද කපා ගන්නා ආකාරයද,මසා ගාන්නා ආකාරයද කියා දෙමි.

රන්ලිය පතරොම් රහිත ඇදුම් මැසීමේ 2 හැකි ඉක්මනින් මුද‍්‍රණය කිරීමට මා බලාපොරොත්තු වෙමි.එමගින් පාඨමාලාවේ ඇති ඉතිරි ඇදුම් කොටස්,නවීනතම ඇදුම් නිර්මාණ සහ සාරි හැට්ට නව නිර්මාණ කිරීම් යනාදී කොටස් පිලිබදව මනා දැනුමක් හා අවබෝදයක් ලබා දීමට මම අවංකව බලාපොරොත්තු වෙමි.

පාසල් යන දියණියන්ට ද දේශීය විදේශීය සිටින ශ‍්‍රී ලංකික කාන්තාවන් හටද මෙම මැහුම් පොත ගුරු අත්පොතක් වී තමාගේ සහ පවුලේ ඇදුම් මසා ගැනීමටද මෙමගින් ආදායම් මාර්ගයක් උපයා ගැනීමට ශක්තිය සහ ධෛර්ය ලැබේවායි මම ප‍්‍රර්ථනා කරමි.

ඉදිරියේදී මා බලාපොරොත්තු වෙනවා බේකරි පාඨමාලාවට සහ තිර රෙදි පාඨමාලාවන් සදහා සිසුන්ගේ ප‍්‍රයෝජනය සදහා ග‍්‍රන්ථයක් නිකුත් කිරීමට.

ප‍්‍රථම මුද්‍රණය 2006
මැහුම් ග‍්‍රන්ථය 2 මුද්‍රණය වෙමින් පවතී.


ආදරණිය ගුරුතුමිය
ගීතා ද සිල්වා


මැහුම් ග‍්‍රන්ථය ලබා ගත හැකි ආකාර

* ඕනෑම සරසවි පොත්හලකින්
* තැපැල් මාර්ගයෙන්
* රන්ලිය ආයතනයේ 026100163254848 - Ranliya Publication - මහජන බැංකුව ගම්පහ ශාඛාව යන ගිණුමට මුදල් දමා රිසිටි පතේ ඡායා පිටපතක් Whatsapp හෝ Viber මගින් අප වෙත යොමු කර 0777394848 / 033-2257705 යන අංක වලින් එකකට දුරකථන ඇමතුමක් ලබා දී ඔබට නිවසටම ගෙන්වා ගත හැකිය.
(රු 300 බෙදා හැරීමේ ගාස්තු අය කෙරේ.)


පතරොම් රහිත ඇදුම් මැසීමේ ග‍්‍රන්ථය 1